![[វិចារណកថា] សម្តីអានុទីនសាបដូចទឹក ក្នុងអំណាចមានដែនកំណត់](https://kptmedia.ap-south-1.linodeobjects.com/2025/10/image-664.png)
[វិចារណកថា] សម្តីអានុទីនសាបដូចទឹក ក្នុងអំណាចមានដែនកំណត់
នាយករដ្ឋមន្ត្រីថៃ លោក អានុទីន ចានវីរៈគុល (Anutin Charnvirakul) ដែលឡើងកាន់អំណាចដឹកនាំនីតិប្រតិបត្តិតាមរយៈកិច្ចសន្យាជាមួយគណបក្សប្រឆាំងដោយសន្យារំលាយសភាត្រឹមរយៈពេល៤ខែនោះ ត្រូវបានគេកត់សម្គាល់ថា ពាក្យសម្តីរបស់លោកគ្មានទម្ងន់នយោបាយ ខណៈរដ្ឋាភិបាលរបស់លោកគ្មានរបៀបវារៈនយោបាយអន្តរជាតិជាក់លាក់ ក្រៅពីបង្កជម្លោះជាមួយកម្ពុជានោះទេ។ ការថ្លែងនានាជាសាធារណៈរបស់ លោក អានុទីន ខកខានទាក់ទាញការចាប់អារម្មណ៍ពីបណ្តាញសារព័ត៌មានអន្តរជាតិនៅជុំវិញពិភពលោក ដោយសារតែខ្វះតម្លៃព័ត៌មានជាសកល ដោយសារតែគិតតែរឿងតូចតាចក្នុងស្រុក ដែលធ្វើឲ្យលោក អានុទីន ក្លាយជានយោបាយរដ្ឋមន្ត្រីដែលគ្មានទម្ងន់នយោបាយអន្តរជាតិឡើយ។ បន្ទាប់ពីប្រតិបត្តិការការងារពេញលេញក្នុងនាមជានាយករដ្ឋមន្ត្រីចាប់តាំងពីថ្ងៃទី១ខែតុលា បន្ទាប់ពីលោក បានថ្លែងគោលនយោបាយនៅក្នុងសភានៅថ្ងៃទី២៩និងថ្ងៃទី៣០ខែតុលា ហើយ សមាជិកសភាថៃបានអនុម័តនៅល្ងាចថ្ងៃទី៣០ខែតុលា។ ក្នុងការថ្លែងសារគោលនយោបាយទៅកាន់សភានោះ លោក អានុទីន បានមិនដែលបានធ្វើចំណាប់អារម្មណ៍ពាក់ព័ន្ធកិច្ចការអន្តរជាតិសោះឡើយ។ អ្វីដែលអនុទីនបង្កឲ្យមានការចាប់អារម្មណ៍នោះ គឺថាត្រង់លោកនិយាយបង្កជម្លោះជាមួយកម្ពុជា ដើម្បីបង្កើនប្រជាប្រិយភាពរបស់ខ្លួនសម្រាប់ការបោះឆ្នោតមុនអាណត្តិដែលគ្រោងទុកសម្រាប់ខែមេសាឆ្នាំ២០២៦។ ស្ថិតក្នុងតំណែងនាយករដ្ឋមន្ត្រីដែលអនុវត្តការងារពេញលេញរយៈពេលជាង១សប្តាហ៍នេះ លោក អានុទីន ចានវីរៈគុល ពិតជាមិនបានទទួលការចាប់អារម្មណ៍ពីសារព័ត៌មានល្បីៗរបស់អន្តរជាតិ ដោយសារកត្តាមួយចំនួនដូចខាងក្រោម៖ កត្តាលោកអានុទីនផ្ទាល់៖ នាយករដ្ឋមន្ត្រី អានុទីន ចានវីរៈគុល ជាប់ជានាយករដ្ឋមន្ត្រីថៃ ដោយសារតែមានកិច្ចសន្យានយោបាយជាមួយគណបក្សប្រជាជនថៃ ដែលជាបក្សប្រឆាំងធំបំផុត ដោយសន្យាដឹកនាំត្រឹមតែរយៈពេល៤ខែនោះ រួចហើយត្រូវរំលាយសភាដើម្បីរៀបចំការបោះឆ្នោតឡើងវិញនៅមុនអាណត្តិ។ ការកាន់កិច្ចការរយៈពេលខ្លីនេះ លោកអានុទីន មានរបៀបវារៈនយោបាយធ្វើតែកិច្ចការផ្ទៃក្នុងប្រទេសប៉ុណ្ណោះ ដូចជា ការដោះស្រាយគ្រោះធម្មជាតិ បញ្ហាអសន្តិសុខ ការស្តារវិស័យសេដ្ឋកិច្ច និងការដោះស្រាយជម្លោះព្រំដែនជាមួយកម្ពុជា។ ត្រឹមរយៈពេល៤ខែ ពិតណាស់ ដោយលោកទាំងមិនដឹងខ្លួនឯងថា នឹងមានវាសនាជាប់ឆ្នោតបន្តឬអត់ផងនោះ លោកត្រូវប្រឹងប្រែងនិយាយការពារទឹកដី បង្កជម្លោះដើម្បីធ្វើយ៉ាងណាឲ្យប្រជាជនជនថៃដែលជ្រុលនិយមងាកមកគាំទ្រលោកឲ្យបានច្រើន ក្រែងមានវិសនាបន្តកាន់ទៅអាណត្តិក្រោយ។ កត្តាពាក្យសម្តី៖ ជាទូទៅ សារព័ត៌មានបរទេសផ្តោតលើ ភាពពាក់ព័ន្ធគ្នាក្នុងភូមិសាស្ត្រនយោបាយ និងតម្លៃព័ត៌មាន (News Value) ជាជាងសម្តីមេដឹកនាំប្រទេសមួយដែលបាននិយាយ «ត្រឹមតែឲ្យបាននិយាយ»។ នៅក្នុងន័យនេះ នាយករដ្ឋមន្ត្រីថៃ លោក អានុទីន ចានវីរៈគុល មិនបានផ្តោតលើខ្លឹមសារទូលំទូលាយ ដែលអាចឲ្យពិភពលោកមើលឃើញពីតម្លៃនៃពាក្យសម្តីដែលកើតចេញពីការពិចារណាឡើយ ប៉ុន្តែការនិយាយរបស់នាយករដ្ឋមន្ត្រីខ្ចីខែនេះ បានត្រឹមបង្កអរិភាពជាមួយកម្ពុជាប៉ុណ្ណោះ។ សម្តីមេដឹកនាំថៃបែបមិនអាចយកជាការបាន ស្តែងឲ្យឃើញ ពេលលោកចុះទៅខេត្តស៊ីសាកេតកាលថ្ងៃទី៣ខែតុលា ដើម្បីជួបប្រជាជន មន្ត្រីមូលដ្ឋាន និងក្រុមយោធា ដោយបានថ្លែងថា «នរណាចង់ឲ្យបើកព្រំដែន នឹងត្រូវវាយដល់ងាប់ (Anyone who wants the border crossing opened will be beaten to death)» ជាដើម ដែលឆ្លុះបញ្ចាំងនូវរឿងអសីលធម៌របស់មេដឹកនាំប្រទេស និងប្រៀបបាន ការនិយាយនោះទៅនឹង «កូនក្មេងនិយាយចំអកដាក់គ្នា»។ កត្តាពេលវេលា៖ ជាទូទៅ ការឡើងកាន់អំណាចរបស់លោក អានុទីន ចានវីរៈគុល កើតឡើងចំពេលដែលមេដឹកនាំពិភពលោកត្រៀមសម្រាប់ការប្រជុំមហាសន្និបាតអង្គការសហប្រជាជាតិ ដែលមានបញ្ហាស្មុគស្មាញជាច្រើនត្រូវផ្តោតការយកចិត្តទុកដាក់និងផ្តល់ដំណោះស្រាយ។ ការឡើងថ្លែងគោលនយោបាយរបស់លោក អានុទីន ទៀតសោតចំថ្ងៃដែលមេដឹកនាំនៃបណ្តាប្រទេសនានាលើពិភពលោក បានប្រមូលផ្តុំគ្នាក្នុងកិច្ចប្រជុំមហាសន្និបាតអង្គការសហប្រជាជាតិ ចាប់តាំងពីដើមសប្តាហ៍ថ្ងៃទី២៣ រហូតដល់ថ្ងៃទី២៩ខែកញ្ញា ដោយមានបញ្ហាពិភពលោកជាច្រើនត្រូវដោះស្រាយ ក្នុងនោះ មានសង្គ្រាមនៅអ៊ុយក្រែន សង្គ្រាមនៅមជ្ឈិមបូព៌ា ការប្រែប្រួលអាកាសធាតុ ជនអន្តោប្រវេសន៍ និង ការរត់ប្រណាំងសព្វាវុធជាដើម។ ដូចនេះ ការថ្លែងអ្វីជាដំណោះស្រាយក្នុងប្រទេសថៃរបស់លោក អានុទីន ត្រូវបានសារព័ត៌មានអន្តរជាតិ រំលងចោល ដោយសារតែរបៀបវារៈឬថា ខ្លឹមសារនោះវាតូចតាចពេក។ កត្តាឥទ្ធិពលនយោបាយសកល៖ មានការកត់សម្គាល់ថា សម្តីរបស់នាយករដ្ឋមន្ត្រីថៃទី៣២ លោក អានុទីន ផ្តោតតែលើបញ្ហាក្នុងប្រទេសប៉ុណ្ណោះ ដូចជា ការជំរុញសេដ្ឋកិច្ចងើបឡើងវិញដោយជំរុញការចំណាយរបស់ប្រជាជន ការធ្លាក់ចុះការមកដល់របស់ភ្ញៀទេសចរ កំណែទម្រង់សុខាភិបាល និងការគ្រប់គ្រងរដ្ឋបាលថ្នាក់ក្រោម ដែលមិនឆ្លុះបញ្ចាំងគោលនយោបាយអន្តរជាតិ និង សន្តិសុខសាកលឡើយ។ ដូចនេះ តម្លៃព័ត៌មានមិនអាចឈានដល់កម្រិតដល់ការីនិពន្ធ ( Editors) យកទៅពិចារណាសម្រប់ការចេញផ្សាយនោះទេ។ សារព័ត៌មានបរទេសជាទូទៅផ្តល់អាទិភាពលើសេចក្តីថ្លែងទាំងឡាយណាដែលពាក់ព័ន្ធដល់ ការផ្លាស់ប្តូរគោលនយោបាយបរទេស ការឆ្លើយតបវិបត្តិ ឬក៏ការចងសម្ព័ន្ធមិត្តដែលប៉ះពាល់ឬមានឥទ្ធិពលដល់ប្រទេសដទៃ។ កន្លងមកនេះ ការថ្លែងរបស់លោក លោក អានុទីន ផ្តោតតែលើបញ្ហាក្នុងប្រទេសថៃប៉ុណ្ណោះ ជាពិសេសពាក់ព័ន្ធដល់អភិបាលកិច្ចរបស់រដ្ឋាភិបាលរបស់លោក ដោយមិនបានឆ្លុះបញ្ចាំងពីនយោបាយសកលទេ។ សរុបសេចក្តីមក ការនិយាយរបស់នាយករដ្ឋមន្ត្រីថៃ លោក អានុទីន ចានវីរៈគុល គឺផ្សព្វផ្សាយតែក្នុងរង្វង់អ្នកសារព័ត៌មានថៃដែលសំដៅដល់ការប៉ុនប៉ងបញ្ឈឺចិត្តថ្នាក់ដឹកនាំនិងប្រជាជនកម្ពុជា ប៉ុន្តែប្រជាជនកម្ពុជាបានដឹងច្បាស់ពីចំណុចទាំងនេះ ហើយក៏នឹកសង្វេគថា «ហេតុអ្វីបានជាមេដឹកនាំថៃនិយាយអ្វី និង សារព័ត៌មានថៃផ្សព្វផ្សាយអ្វីខ្វះការថ្លឹងថ្លែងបែបនេះ?»៕