Sarah Jessica Parker: “Tani zgjedh punët që më lejojnë të kem ekuilibër mes jetës dhe karrierës”

Aktorja dhe producentja e serialit të HBO-së And Just Like That po i qaset karrierës me një filozofi të re. Pas dekadash në skenë dhe ekran, Sarah Jessica Parker e sheh suksesin ndryshe nga dikur, jo më si një garë për të arritur majat, por si një proces që duhet të përputhet me jetën personale. Në Festivalin e The New Yorker në tetor 2025, Parker tha se puna pranë shtëpisë së saj në Nju Jork është një nga përfitimet më të mëdha të projektit aktual. Ajo ka qenë aktore që në moshën 11-vjeçare, duke ndërtuar një karrierë mbi ambicien dhe pasionin për role që e sfidonin dhe e çonin përpara profesionalisht. Por sot, në moshën 60-vjeçare dhe me dy vajza adoleshente në shtëpi, ajo pranon se mënyra si zgjedh projektet ka ndryshuar rrënjësisht. “Po bëj zgjedhje ndryshe nga më parë,” tha ajo. “Kur je në fillim të rrugëtimit, kërkon mundësi që të mësosh, të udhëtosh, të punosh me njerëz interesantë. Por tani jam më e kujdesshme për mënyrën si do ta kaloj kohën time.” Parker rrëfeu se çdo rol i ri shoqërohet me një sërë pyetjesh personale: “Çfarë do të më largojë nga vajzat e mia tani? Sa ditë do të jem larg shtëpisë? Çfarë angazhimesh po humbas?” — pyetje që e ndihmojnë të vendosë me vetëdije për prioritetet e saj. Ekspertët e lidershipit theksojnë se ndryshimi i përkufizimit të suksesit është një proces i shëndetshëm. Simon Sinek, në podcastin e tij A Bit of Optimism, tha se ideja se “po mbetesh pas” nënkupton një garë me një vijë fundore, “dhe kjo është krejt e gabuar”. Sipas tij, karriera duhet të shihet si një udhëtim që kërkon zhvillim të vazhdueshëm, jo si një garë për përfitime të menjëhershme. Për Parker, gjetja e ekuilibrit nuk kufizohet vetëm në zgjedhjen e roleve. Përveç aktrimit, ajo drejton një linjë vere në bashkëpunim me kompaninë Invivo, është pjesë e jurisë së Çmimit Booker Prize 2025 dhe angazhohet në organizatën The States Project, që mbështet kandidatë dhe kauza demokratike në nivel shtetëror. Aktorja pranoi se mundësia për të menaxhuar kaq shumë angazhime vjen falë mbështetjes që ka në shtëpi. “E di pse unë mund të bëj kaq shumë gjëra, sepse kam llojin e mbështetjes që më duhet. Ajo që më habit më shumë janë të gjitha gratë, burrat dhe prindërit në këtë qytet e në gjithë vendin që mbajnë dy ose tre punë dhe nuk e kanë këtë ndihmë, por ia dalin çdo ditë.” Sot, për Sarah Jessica Parker, suksesi nuk matet më me famë apo arritje profesionale, por me aftësinë për të qenë e pranishme, në punë, në shtëpi dhe në jetën e përditshme. / CNBC